لاہور: پاکستان کے بڑھتے ہوئے درآمدی انحصار کو کم کرنے کے لیے ایک اہم پیش رفت کے طور پر پاکستانی حکومت غیر ملکی تیل کمپنیوں کے ساتھ ایک سنہری معاہدہ کرنے پر غور کر رہی ہے، جس سے وہ اپنی مرضی کے مطابق بانڈڈ سٹوریج کی سہولیات کو چلا سکیں گے۔
باخبر ذرائع نے بتایا کہ غیر ملکی سپلائرز کو پاکستانی بندرگاہوں کے قریب اپنے کسٹمز پبلک بانڈڈ ویئر ہاؤسز قائم کرنے کے لیے بااختیار بنایا جائے گا جو خام تیل اور پیٹرولیم مصنوعات کی وسیع انوینٹریز کو برقرار رکھنے کے لیے سٹریٹجک پوزیشن میں ہوں گے۔ ذرائع کے مطابق مذکورہ تیل کمپنیاں بھی پاکستان کے ساتھ معاہدہ کرنے کی خواہاں ہیں۔
یہ پیش رفت اگر عمل میں آتی ہے تو مقامی آئل مارکیٹنگ کمپنیوں (OMCs) پر بوجھ کم کرنے میں مدد ملے گی خاص طور پر ڈالر کی ادائیگیوں کے حوالے سے پاکستان کے زرمبادلہ ذخائر پر دبائو میں کمی آئے گی۔
پاکستانی روپیہ کی قدر میں مسلسل کمی کی وجہ سے آئل مارکیٹنگ کمپنیوں کی قوت خرید بہت تیزی سے کم ہو رہی ہے۔ باہر سے تیل خریدنے کیلئے بینکوں کو ایل سیز جاری کرنا پڑتی ہیں اور اس میں کم از کم 25 دن کا وقت لگتا ہے۔ اگر سپلائیرز پاکستان میں تیل رکھیں تو یہ سارا وقت بچ جائے گا۔ بینکوں کا کردار بھی محدود ہوسکتا ہے کیونکہ انہیں اس ضرورت کو پورا کرنے کے لیے اضافی ایل سیز کھولنے کی ضرورت نہیں ہو گی۔
لیکن فی الحال پہلا مرحلہ تیل کمپنیوں کو ملک میں پٹرولیم مصنوعات لانے کی اجازت سے متعلق ہے۔ یہ بہت مثبت پیش رفت ہے کیونکہ بچت پاکستان منتقل ہو جائے گی اور ڈالر کے اخراج کو بھی منظم کیا جا سکے گا۔
تاہم اس اہم پیش رفت نے مقامی ریفائنریز کے لیے تشویش پیدا کر دی ہے کیونکہ آئل مارکیٹنگ کمپنیاں ان کنسائنیز سے تیل خریدنے کو ترجیح دے سکتی ہیں نہ کہ ریفائنریوں سے۔
تاہم ایسا نہیں ہوگا چونکہ ہر ماہ وزارت توانائی پٹرولیم مصنوعات کی کمی کو پورا کرنے کے لیے درآمد کے لیے آئل کمپنیوں کو ایک کوٹہ مختص کرتی ہے جو مقامی ریفائنریز انہیں فراہم نہیں کرتیں۔
یہ منصوبہ گوداموں کے قیام کے ارد گرد گھومتا ہے جو غیر ملکی زرمبادلہ کی ترسیلات سے آزادانہ طور پر کام کرتے ہیں جب تک کہ مصنوعات کو مقامی خریداروں کو فروخت نہیں کیا جاتا یا دوبارہ برآمد نہیں کیا جاتا۔
غیر ملکی سپلائرز پاکستان میں ایک رجسٹرڈ ذیلی ادارہ قائم کریں گے، جسے Consignee کے نام سے جانا جاتا ہے، جو غیر ملکی سپلائرز اور مقامی خریداروں دونوں کی جانب سے آپریشنل اور کاروباری سرگرمیاں کرنے کے لیے ذمہ دار ہے۔
بغیر کسی رکاوٹ کے آپریشنز کو یقینی بنانے کے لیے کنسائنی آئل اینڈ گیس ریگولیٹری اتھارٹی (اوگرا) کے وضع کردہ ضوابط پر سختی سے عمل کرتے ہوئے بندرگاہ کے احاطے کے ارد گرد ذخیرہ کرنے کے لیے انفراسٹرکچر تیار کرے گا۔
فروخت کے عمل میں پاکستان کے لائسنس یافتہ خریداروں، جیسے ریفائنریز یا آئل کمپنیوں کو شیڈول بینکوں کے ذریعے لیٹرز آف کریڈٹ (LC) کھولنے کے خلاف سامان فروخت کرنا شامل ہو گا۔
یہ بات قابل ذکر ہے کہ بین الاقوامی بینکوں کی طرف سے ایل سی کی تصدیق یا پیشگی ادائیگی کی ضرورت ختم ہو جائے گی، بشرطیکہ قابل اطلاق زرمبادلہ کے ضوابط کے مطابق کرنسی (امریکی ڈالر یا پاک روپے) پر باہمی معاہدہ طے پا جائے۔
غیر ملکی سپلائرز کی طرف سے بڑے پیمانے پر خریداری انہیں کم نرخوں پر سامان کی فراہمی اور فریٹ چارجز کو کم کرنے کے قابل بنائے گی، جس سے سپلائرز اور مقامی صارفین دونوں کو فائدہ ہوگا۔
مزید برآں، حکومت کو محصولات میں کسی قسم کے نقصان کا سامنا نہیں کرنا پڑے گا کیونکہ مقامی استعمال کے لیے کلیئر کیے گئے سامان کے لیے غیرملکی زرمبادلہ کی واپسی، جی ڈی فائلنگ اور ڈیوٹی اور ٹیکس کی ادائیگی کی ضرورت ہوگی۔
اس سکیم کو خودکار اور پریشانی سے پاک ماحول میں نافذ کرنے سے بلک گودام میں غیر ملکی سرمایہ کاری کو راغب کیا جائے گا، گودام کے کاروبار میں روزگار کے مواقع پیدا ہوں گے اور ملک کی توانائی کی حفاظت میں مدد ملے گی۔
ابھی تک، سمری کو کابینہ کی اقتصادی رابطہ کمیٹی (ای سی سی) کو پیش کرنے کے لیے وزیر اعظم، جو پیٹرولیم ڈویژن کے وزیر انچارج بھی ہیں، کی طرف سے اختیار کیا گیا ہے۔
دریں اثنا، اوگرا مجوزہ سکیم کے تحت درآمدات اور برآمدات کو ریگولیٹ کرنے کے طریقہ کار کی تجویز اور نگرانی کرے گا۔
