اسلام آباد: پاکستان ٹیلی کمیونیکشن لمیٹڈ (پی ٹی سی ایل) اور قومی سیٹلائٹ کمپنی پاک سیٹ نے تیز ترین انٹرنیٹ اور رابطہ کی جدید ترین سروسز کی فراہمی کیلئے تزویراتی شراکت داری کے معاہدہ پر دستخط کر دیے۔
شراکت داری کی دستاویزات پر دستخط کی تقریب میں چیئرمین سپارکو میجر جنرل عامر ندیم، چیف ایگزیکٹو پاک سیٹ صداقت لیاقت، پی ٹی سی ایل اور یوفون کے سربراہ حاتم بامتروف، چیف بزنس سروسز آفیسر پی ٹی سی ایل ضرار ہشام سمیت دونوں کمپنیوں کے اعلیٰ حکام نے شرکت کی۔
اس شراکت داری کے نتیجے میں پی ٹی سی ایل قومی سیٹلائٹ بینڈ ودتھ کی ضروریات پوری کرنے کیلئے پاک سیٹ کی معاونت کرے گا جبکہ پاک سیٹ متعارف ہونے والی تمام جدید سروسز کی فراہمی میں معاونت دے گی، اس کے علاوہ سیٹلائٹ گیٹ وے کے اے بیبڈ (ka-band) اور خلاء میں آئی او ٹی (IoT) سپیس پر خصوصی توجہ مرکوز کرتے ہوئے سیٹلائٹ پراجیکٹس کی تنصیب کو یقینی بنایا جائے گا۔
PTCL & PAKSAT partner for indigenization & delivery of Satellite Services in Pakistan & region
Read more: https://t.co/cyVh49soEQ #PTCL #PAKSAT #PTCLBusinessSolutions #Pakistan #Satellite pic.twitter.com/oOEzEnLeTZ
— PTCL (@PTCLOfficial) July 27, 2021
پی ٹی سی ایل کے ضرار ہشام نے کہا کہ یہ شراکت داری پاکستان کے اپنے سیٹلائٹ کے ذریعے صارفین کو بلاتعطل رابطہ کی سہولت فراہم کرنے کے قابل بنائے گی اور ملک میں ڈیجیٹل ٹرانسفارمیشن اور ٹیکنالوجی پر مبنی انقلاب لانے میں کردار ادا کرنے میں مدد ملے گی۔
پاک سیٹ کے صداقت لیاقت نے کہا کہ دونوں ادارے دور درازعلاقوں میں رہائش پذیر آبادی اور وہاں قائم کاروبار ی اداروں کو مواصلاتی سہولیات فراہم کرتے ہوئے ملک میں ڈیجیٹل تفریق کو مل کر ختم کر پائیں گے۔
انہوں نے کہا کہ نئے سیٹلائیٹ ایم ایم ون (MM1)، جو جلد آن لائن ہونے والا ہے، کے ساتھ یہ شراکت داری پاکستان میں ڈیجیٹل ٹرانسفارمیشن کو عملی جامہ پہنانے میں کلیدی کردار ادا کرے گی۔ ٹیکنالوجی سے کارپوریٹ سیکٹر اور سرکاری اداروں کو آئی او ٹی (IoT) ٹیلی میٹری اور ہائی سپیڈ انٹرنیٹ جیسی سہولتیں ملیں گی۔
