گوادر: چین پاکستان اقتصادی راہداری (سی پیک) اتھارٹی کے چیئرمین لیفٹیننٹ جنرل (ر) عاصم سلیم باجوہ نے کہا ہے کہ گوادر پورٹ کو مکمل فعال کر دیا گیا ہے۔
عاصم سلیم باجوہ نے سوموار کو گوادر کا دورہ کیا جہاں پریس کانفرنس کرتے ہوئے انہوں نے کہا کہ گوادر بندرگاہ مکمل فعال کر دی گئی ہے اور اس پر تجارتی ٹریفک بڑھانے پر توجہ مرکوز ہے، سامان کی ترسیل کے لیے آن لائن بکنگ کی جا سکتی ہے۔
چئیرمین سی پیک اتھارٹی، عاصم سلیم باجوہ کی اہم نیوز کانفرنس۔@AsimSBajwa @CPECAuthority https://t.co/x56Y8w2qyq
— Government of Pakistan (@GovtofPakistan) May 31, 2021
عاصم سلیم باجوہ نے کہا کہ وزیراعظم نے نوکریاں فراہم کرنے اور گوادر میں ووکیشنل ٹریننگ انسٹی ٹیوٹس کے قیام کیلئے خصوصی زور دیا ہے، اڑھائی تین سال میں گوادر میں 12 ہزار افراد کو ملازمتیں فراہم کی گئی ہیں۔
یہ بھی پڑھیے:
سی پیک: چینی سرمایہ کاروں کیلئے ویزہ کے خصوصی طریقہ کار کی منظوری
سی پیک کے تحت چار اقتصادی زونز پر کام جاری، 14 لاکھ نوکریاں پیدا ہوں گی
سی پیک سے پاکستان کے سماجی شعبہ میں مجموعی طور پر 5.21 فیصد ترقی متوقع، امریکی جریدہ
انہوں نے کہا کہ گوادر میں سپورٹ انفراسٹرکچر پر کام تیزی سے جاری ہے، گوادر سٹی کا ماسٹر پلان منظور ہو چکا ہے اور عمل درآمد کے مرحلے پر ہے۔ ائیر پورٹ پر بھی کام کافی تیز رفتاری سے جاری ہے۔
چیئرمین سی پیک اتھارٹی کا کہنا تھا کہ گوادر بندرگاہ کے بارے میں بہت غلط تاثر پیش کیا جاتا رہا ہے، اس کی ترقی میں مستقبل میں مزید تیزی نظر آئے گی، جنوبی بلوچستان کے علاقوں کو ماضی میں نظر انداز کیا گیا، اب ان علاقوں میں سڑکیں بنائی جا رہی ہیں۔
عاصم سلیم باجوہ نے کہا کہ گوادر میں چین کے تعاون سے ہسپتال بھی بن رہا ہے، بلوچستان کے کسانوں کے ساتھ ملاقات کی ہے، زراعت کا پلان سی پیک کے دوسرے مرحلے کا حصہ ہے، ماہی گیروں کے تمام مسائل بھی حل کریں گے۔ ایم۔8 کا ایک سیکشن رہ گیا تھا جو متبادل راستہ ہے جس پر کام تیزی سے جاری ہے۔
