اسلام آباد: وفاقی حکومت نے پیٹرولیم مصنوعات کی قیمتوں میں پندرہ روزہ اضافہ نہ کرنے کا فیصلہ کیا ہے۔
وزارت خزانہ کی جانب سے جاری کردہ اعلامیہ میں کہا گیا ہے کہ یکم مئی سے 15 مئی 2021ء تک پیٹرولیم مصنوعات کی موجودہ قیمتیں برقرار رہیں گی۔
اعلامیہ میں بتایا گیا کہ پٹرول کی فی لیٹر قیمت 108 روپے 56 پیسے، ڈیزل کی فی لٹر قیمت 110 روپے 76 پیسے، مٹی کے تیل کی قیمت 80 روپے اور لائٹ ڈیزل آئل 77 روپے 65 پیسے فی لٹر پر برقرار رہے گی۔
وزیراعظم کے معاون خصوصی برائے سیاسی امور ڈاکٹر شہباز گل نے ایک ٹویٹ میں کہا کہ وزیراعظم نے فیصلہ کیا ہے کہ پیٹرولیم مصنوعات کی قیمت نہیں بڑھائی جائیں گی۔
وزیراعظم عمران خان نے فیصلہ کیا ہے کہ پٹرولیم مصنوعات کی قیمت نہیں بڑھائی جائے گی۔ اوگرا کی سمری میں 5 سے 10 روپے اضافے کی سفارش کی گئی تھی۔ وزیراعظم نے اسے نامنظور کر کے 16 اپریل کی قیمتیں برقرار رکھنے کا فیصلہ کیا۔
اوگرا کی سفارش کردہ قیمتیں لف ہیں۔ جو منظور نہیں کی گئیں pic.twitter.com/ngCNpmQ7Yf
— Dr. Shahbaz GiLL (@SHABAZGIL) April 30, 2021
شہباز گل نے کہا کہ اوگرا کی سمری میں 5 روپے سے 10 روپے اضافے کی سفارش کی گئی تھی لیکن وزیراعظم نے اوگرا کی سمری نامنظور کرکے 16 اپریل کی قیمتیں برقرار رکھنے کا فیصلہ کیا ہے۔
واضح رہے کہ 15 اپریل کو وزیراعظم عمران خان نے پیٹرولیم مصنوعات کی قیمتوں میں کمی کی منظوری دے دی تھی جس کے بعد پٹرول 1.79 روپے اور ڈیزل 2.32 روپے فی لٹر سستا ہو گیا تھا، مٹی کے تیل میں 2.06 روپے اور لائٹ ڈیزل آئل کی قیمت میں 2.21 روپے فی لٹر کمی ہو گئی تھی۔
