سول سرونٹس کے محکمانہ احتساب کیلئے نئے قواعدوضوابط منظور

افسر مجاز کا درجہ ختم، ملازم کو الزامات کا جواب 14 دن میں دینا ہو گا، انکوائری کمیٹی 60 دن میں تحققیات مکمل کریگی، مزید 30 دن کے اندر فیصلہ سنانا ہوگا

499

اسلام آباد: وزیرِ اعظم عمران خان نے سول سرونٹس کارکردگی اور نظم و ضبط قواعد 2020ء کی منظوری دے دی۔

بدھ کو وزیراعظم آفس کے میڈیا ونگ سے جاری بیان میں کہا گیا ہے کہ ان قوانین کا مقصد سول سرونٹس کی کارکردگی کو بہتر کرنا اور محکمانہ احتساب کے نظام کو شفاف اور موثر بنانا ہے۔

ان قواعد کے نمایاں خدوخال کے مطابق محکمانہ احتساب کے عمل کو تیز بنانے کی خاطر افسر مجاز (اتھورائزڈ آفیسر) کا درجہ ختم کر دیا گیا ہے لہٰذا اب صرف اتھارٹی اور انکوائری افسر/کمیٹی ہوں گے۔

اس عمل کو دو درجات میں کرنے سے مجاز اتھارٹی کی منظوری کے بغیر نچلی سطح پر ہی افسر مجاز کی جانب سے معمولی سزا ئیں دیئے جانے کا مسئلہ حل ہو جائے گا۔

نئے قواعد میں ہر مرحلے کے لئے ٹائم لائنزمقرر کر دی گئی ہیں۔ چارجز (الزامات) کا جواب (10 سے 14 دن)، انکوائری کمیٹی /افسر کی جانب سے کارروائی مکمل کرنے کا وقت 60 دن متعین کیا گیا ہے۔ اتھارٹی کی جانب سے کیس کا فیصلہ 30 دنوں میں کیا جائے گا۔

انصاف کے تقاضوں کو یقینی بنانے اور الزام علیہ کو شخصی سماعت کا موقع اتھارٹی /سماعت کرنے والے افسر کی جانب سے فراہم کیا جائے گا۔

پلی بارگین اور والنٹری ریٹرن کو بھی بدعنوانی (مس کنڈکٹ) کے زمرے میں شامل کیا گیا اور ایسے افسران کے خلاف کارروائی عمل میں لائی جائے گی۔

ریکارڈ کی فراہمی، محکمانہ نمائندے کی جانب سے تاخیر، معطلی، ڈیپوٹیشن/رخصت/سکالرشپ پر گئے افسران کے حوالے سے معاملات کو واضح طور پر وضع کر دیا گیا ہے۔

اسٹیبلشمنٹ ڈویژن کو ان قواعد کے حوالےسے ذیلی قواعد/ وضاحت وضع کرنے کا اختیار دیا گیا ہے۔ کسی ایسے کیس میں جہاں متعدد افسران پر الزام ہو، وہاں صرف ایک انکوائری افسر مقرر کیا جائے گا۔

اس اقدام کا مقصد شفافیت کو یقینی بنانا اور ایک ہی کیس میں مختلف انکوائری افسران کی جانب سے مختلف فیصلوں کی شکایت کو دور کرنا ہے۔

پاکستان ایڈمنسٹریٹیو سروس اور پولیس کے افسران جو صوبوں میں تعینات ہوں گے ان کے حوالے سے چیف سیکرٹری صاحبان کو دو ماہ میں فیکٹ فائنڈنگ رپورٹ پیش کرنا ہو گی بہ صورت دیگر اسٹیبلشمنٹ ڈویژن خود کارروائی کرے گی۔

جواب چھوڑیں

Please enter your comment!
Please enter your name here