وزارت تجارت نے ڈی ایل ٹی ایل سکیم کے تحت 6 ارب روپے جاری کر دئیے

ڈراء بیک آف لوکل ٹیکسز اینڈ لیویز سکیم کے تحت 5 ارب 60 کروڑ روپے ٹیکسٹائل سیکٹر جبکہ 40 کروڑ روپے نان ٹیکسٹائل شعبہ کیلئے جاری کیے گئے

105

اسلام آباد: وزیراعظم کے مشیر برائے تجارت و سرمایہ کاری عبدالرزاق داﺅد نے کہا ہے کہ وزارت تجارت نے ڈراء بیک آف لوکل ٹیکسز اینڈ لیویز (ڈی ایل ٹی ایل) سکیم کے تحت 6 ارب روپے جاری کر دئیے ہیں۔

اپنے ٹویٹ میں وزیراعظم کے مشیر نے کہا کہ وزارت تجارت نے ڈراء بیک آف لوکل ٹیکسز اینڈ لیویز سکیم کے تحت 6 ارب روپے میں سے 5 ارب 60 کروڑ روپے ٹیکسٹائل سیکٹر جبکہ 40 کروڑ روپے نان ٹیکسٹائل شعبہ کیلئے جاری کیے ہیں۔

انہوں نے امید ظاہرکی ہے کہ اس اقدام سے برآمدکنندگان کو کیش کے مسائل کو حل کرنے میں مدد ملے گی اور وہ ملکی برآمدات میں اضافہ کے قابل ہو جائیں گے۔

واضح رہے کہ حکومتی اقدامات اور ٹیکسٹائل سیکٹر کے برآمدکنندگان کی محنت کی وجہ سے گزشتہ مالی سال کے دوران ٹیکسٹائل کی قومی برآمدات کا حجم 23 فیصد اضافہ سے 15 ارب 40 کروڑ ڈالر تک بڑھ گیا۔

واضح رہے کہ دسمبر 2020ء میں وفاقی حکومت نے آئندہ پانچ سالوں کے دوران ٹیکسٹائل اور اپیرل ایکسپورٹس کے لیے 20.86 ارب ڈالر برآمدات کا ہدف مقرر کیا تھا۔

وزارتِ تجارت کے مالی سال 2020-21ء کے لیے ٹیکسٹائل برآمدات کا ہدف 13.6 ارب ڈالر مقرر کیا گیا تھا تاہم مالی سال کے اختتام پر ٹیکسٹائل اور اپیرل برآمدات کا مجموعی حجم 15 ارب 40 کروڑ ڈالر تک بڑھ گیا۔

وفاقی حکومت نے مالی سال 2021-2022 کے لیے 14.7 ارب ڈالر، 2022-2023 کے لیے 16.3 ارب ڈالر، 2023-2024 کے لیے 18.3 ارب ڈالر اور 2024-2025 کے لیے 20.8 ارب ڈالر کی ٹیکسٹائل مصنوعات برآمدات کرنے کا ہدف مقرر کر رکھا ہے۔

جواب چھوڑیں

Please enter your comment!
Please enter your name here