اسلام آباد: سٹیٹ بینک آف پاکستان (ایس بی پی) نے کووڈ۔19 کے دوران کاروباروں کی بحالی، توسیع اور نئے منصوبوں کے لئے 537.6 ارب روپے کے 609 مختلف منصوبوں کی منظوری دی ہے۔
اس حوالہ سے مرکزی بینک کو 751.26 ارب روپے مالیت کے 671 مختلف منصوبوں کے لئے درخواستیں جمع کرائی گئی ہیں۔
رپورٹ کے مطابق سٹیٹ بینک نے کورونا وائرس کے اثرات سے تحفظ کے لئے ری فنانسنگ کی سکیم کے تحت اب تک 657.154 ارب روپے کے قرضوں کے اصل زر کی وصولی کو بھی ایک سال کے لئے موخر کیا ہے۔
مزید برآں سٹیٹ بینک کی جانب سے 246.31 ارب روپے کے مختلف قرضہ جات کی ری شیڈولنگ اور ری سٹرکچرنگ کی بھی منظوری دی گئی ہے۔
رپورٹ کے مطابق ایس بی پی کی جانب سے روزگار کے تحفظ کے لئے دو ہزار 958 کاروباری اور صنعتی اداروں کو کووڈ۔19 کے اثرات سے محفوظ رکھنے کے لئے 238.2 ارب روپے بھی فراہم کئے جا چکے ہیں۔
اُدھر ایس بی پی کی طرف سے کووڈ۔19 سمیت دیگر مختلف بیماریوں کے علاج معالجہ کی سہولتوں میں بہتری کے لئے ملک کے 43 مختلف ہسپتالوں کے لئے بھی 10.1 ارب روپے کے قرضے منظور کئے گئے ہیں جبکہ اب تک ملک بھر سے 47 ہسپتالوں کی جانب سے 15.8 ارب روپے کے قرضوں کے لئے درخواستیں جمع کرائی گئی تھیں۔
واضح رہے کہ وزیراعظم عمران خان کی ہدایات کے مطابق سٹیٹ بینک نے ملک میں چھوٹے، درمیانے اور بڑے صنعتی اور کاروباری اداروں کو وبا کے اثرات سے تحفظ کے لئے جامع حکمت عملی کے تحت اقدامات کیے ہیں تاکہ ملک میں معاشی سرگرمیوں کو بحال رکھا جا سکے۔
