دنیا بھر میں موت کی ایک بڑی وجہ دل کی بیماری کو سمجھا جاتا ہے اور ہارٹ ٹرانسپلانٹ عطیہ کرنے والے افراد کی تعداد بھی کم ہے۔
اس عالمی مسئلے کے پیش نظر Carmat نامی ایک فرانسیسی کمپنی نے حال ہی میں Aeson کے نام سے ایک مصنوعی دل متعارف کرایا ہے۔
مصنوعی دل کی یہ ڈیوائس ایک اوسط انسان کے دل کے برابر کام کرتی ہے جسے بائیولوجیکل میٹیرلز اور سینسرز کے ذریعے استعمال میں لایا جاتا ہے، ڈیوائس کا وزن 900 گرام ہے، یہ ڈیوائس خون کے ساتھ موافقت کی وجہ سے اسے گردش میں رکھنے کیلئے میکینیکل پمپ کے طور پر کام کرتی ہے۔
ہارٹ ڈیوائس بنانے والی کمپنی کارمیٹ کے چیف ایگزیکٹو آفیسر سٹیفن پیاٹ کے مطابق ہارٹ ٹرانسپلانٹ کا یہ تصور 30 سال پرانا ہے البتہ ٹیکنالوجی کے ذریعے انسانی دل کی تبدیلی کے تصور کو دوبارہ سے پیش کیا گیا ہے۔
گزشتہ سال کے آخر تک کمپنی نے ہارٹ ڈیوائس کی باقاعدہ فروخت کیلئے یورپین یونین سے اجازت لی تھی۔ یہ ٹیکنالوجی دل کے ایسے مریضوں کیلئے معجزہ ثابت ہو سکتی ہے جن کا دل بالکل ناکارہ ہو چکا ہو اور انہیں دل عطیہ کرنے والا بھی کوئی نہ ہو۔
