غیرقانونی ہائوسنگ سکیموں کی تفصیلات ویب سائٹس پر جاری کرنے کا حکم

غیر قانونی ہائوسنگ سکیموں میں عام آدمی کی زندگی بھر کی جمع پونجی ضائع ہو جاتی ہے، استحصال کے فوری خاتمے کیلئے ہنگامی بنیادوں پر اقدامات اٹھائے جائیں، وزیراعظم عمران خان

370

اسلام آباد: وزیراعظم عمران خان ہائوسنگ منصوبوں میں قواعد و ضوابط پر عملدرآمد یقینی بنانے، غیر قانونی ہائوسنگ سکیموں کی تفصیلات متعلقہ ویب سائٹس پر جاری کرنے اور عوام کو غیرقانونی ہائوسنگ سکیموں میں خرید و فروخت کے حوالے سے خبردار کرنے کے لئے آگاہی مہم میں تیزی لانے کے ساتھ متعلقہ قوانین میں ترامیم کے حوالے سے سفارشات مرتب کرنے کی ہدایت کی ہے۔

گزشتہ روز قومی رابطہ کمیٹی برائے ہاؤسنگ، تعمیرات و ترقی کا ہفتہ وار اجلاس وزیراعظم کی زیرصدارت منعقد ہوا، اجلاس کو نیپرا کی جانب سے کنزیومر سروس مینول کی تمام اسٹیک ہولڈرز کی مشاورت کے بعد منظوری کے حوالے سے آگاہ کیا گیا۔

اجلاس کو بتایا گیا کہ تعمیرات میں سہولیات کی فراہمی کے ضمن میں کنزیومر مینول میں گرڈ ایریا، لوڈ اسیسمنٹ اور لوڈ کیٹیگری میں بہتر ریگولیٹری فریم ورک کے تحت ترامیم کی گئی ہیں۔

اجلاس کو صوبہ پنجاب اور وفاقی دارالحکومت میں غیرقانونی ہائوسنگ اسکیموں اور تعمیرات کے خلاف کارروائی کے حوالے سے اقدامات پر تفصیلی بریفنگ دی گئی۔

وزیراعظم عمران خان نے غیر قانونی ہائوسنگ منصوبوں اور تعمیرات میں عوام سے ہونے والے فراڈ، خصوصا سمندر پار پاکستانیوں کے استحصال کے فوری خاتمے کے لئے ہنگامی بنیادوں پر اقدامات اٹھانے کی ہدایات دیتے ہوئے کہا کہ ان غیر قانونی ہائوسنگ سکیموں میں عام آدمی کی زندگی بھر کی جمع پونجی ضائع ہو جاتی ہے جس کا فوری سد باب ضروری ہے۔

وزیراعظم عمران خان نے کہا کہ تعمیراتی سرگرمیوں کے فروغ میں شہریوں، خصوصا غریب عوام کا تحفظ اولین ترجیح ہے۔ انہوں نے ہائوسنگ کے منصوبوں میں قوائد و ضوابط پر عملدرآمد یقینی بنانے کی ہدایت کی۔

عمران خان نے غیر قانونی ہائوسنگ سکیموں کی تفصیلات متعلقہ ویب سائٹس پر جاری کرنے اور عوام کو ان غیر قانونی ہائوسنگ سکیموں میں خرید و فروخت کے حوالے سے خبردار کرنے کے لئے آگاہی مہم میں تیزی لانے کے ساتھ ساتھ متعلقہ قوانین میں ترامیم کے حوالے سے سفارشات مرتب کرنے اور ٹائم لائنز متعین کرنے کی بھی ہدایت کی۔

جواب چھوڑیں

Please enter your comment!
Please enter your name here