اسلام آباد: چین پاکستان اکنامک کوریڈور (سی پیک) اتھارٹی کے چئیرمین لیفٹینینٹ جنرل (ر) عاصم سلیم باجوہ نے کہا ہے کہ سی پیک اتھارٹی میں ہیومن اور سوشل ڈویلپمنٹ کی بناء پر تین ماہ کی انٹرن شپ کا آغاز کیا جا رہا ہے۔
سماجی رابطوں کی ویب سائٹ ٹویٹر پر اپنے پیغام میں عاصم سلیم باجوہ نے کہا کہ نوجوانوں کو بااختیار بنانے کے لیے سی پیک کے ذریعے مواقع کی پیشکش کر رہے ہیں، اس سے ملک کو مستقبل میں ترقی و خوشحالی کی راہ پر گامزن کرنے میں مدد ملے گی۔
چئیرمین سی پیک اتھارٹی نے کہا کہ پاکستان کی 60 فیصد آبادی نوجوانوں پر مشتمل ہے، یوں پاکستان نوجوانوں پر مشتمل قیادت کی فراہمی کے ساتھ دنیا کی دیگر معیشتوں کا بآسانی مقابلہ کرنے کے قابل ہو سکتا ہے۔
