اسلام آباد: وزیراعظم عمران خان کے مشیر تجارت عبدالرزاق دائود نے صنعتی شعبہ کی راہ میں درپیش تمام رکاوٹوں کو دور کرنے کی یقین دہانی کروائی ہے۔
انہوں نے اسلام آباد میں فارما سمٹ سے خطاب کرتے ہوئے کہا، حکومت بتدریج روایتی برآمداتی شعبوں سے نئے برآمداتی شعبوں کا رُخ کر رہی ہے جن میں فارماسیوٹیکل، انجینئرنگ اور انفارمیشن ٹیکنالوجی وغیرہ شامل ہیں تاکہ برآمدات کا حجم نمایاں طور پر بڑھایا جا سکے۔
مشیر تجارت نے کہا کہ برآمدات کی بنیاد پر ہونے والی ترقی ملک کو قرضوں کے جال میں پھنسنے سے روکتی ہے۔
ان کا مزید کہنا تھا کہ پاکستان اب اپنی مصنوعات کی برآمد کے لیے نئی منڈیاں بھی تلاش کر رہا ہے۔ انہوں نے نشاندہی کی کہ افریقہ ایک ابھرتی ہوئی منڈی ہے جس سے فائدہ اٹھانے کے لیے ہم نے لک افریقہ پالیسی تیار کی ہے۔
عبدالرزاق دائود نے کہا، ہم نے حال ہی میں نیروبی میں ایک کامیاب کانفرنس کا انعقاد کیا ہے اور افریقی ملکوں کے ساتھ رابطے برقرار رکھنے کے لیے مستقبل قریب میں ایسی مزید کانفرنسوں کا انعقاد کیا جائے گا۔ انہوں نے یہ بھی کہا کہ فارما انڈسٹری کو اپنی برآمداتی حکمتِ عملی تیار کرنی چاہئے۔ انہوں نے یہ یقین دہانی کروائی کہ حکومت فارما مصنوعات کی ایکسپورٹ کے لیے مکمل تعاون کرے گی۔
