سونے کی فی تولہ قیمت میں ایک ہی دن میں 1350 روپے اضافہ

کراچی: عالمی منڈی میں سونے کی قیمتیں بڑھنے کے بعد پاکستان کے صرافہ بازاروں میں سونے کی فی تولہ قیمت میں ایک ہی دن میں 1350 روپے کا اضافہ ہوگیا۔ 

سندھ صرافہ بازار جیولرز ایسوسی ایشن کے مطابق 1350 روپے اضافے کے بعد پاکستان میں ایک تولہ سونے کی قدر 92500 روپے ہوگئی ہے۔

10 گرام سونےکی قدر 1158 روپے اضافے سے 79304 روپے ہے جبکہ عالمی صرافہ بازار میں سونےکی قدر 23 ڈالر اضافے سے 1610 ڈالر فی اونس ہے۔

دوسری جانب پاکستان سٹاک مارکیٹ میں امریکی ڈالر کا ریٹ اتار چڑھاو کا شکار رہا، اوپن مارکیٹ میں ڈالر 10 پیسے سستا جبکہ انٹر بینک میں 6 پیسے مہنگا ہو گیا۔

اوپن مارکیٹ میں امریکی ڈالر 10 پیسے سستاہو کر 154 روپے 30 پیسے پر فروخت ہوتا رہا جبکہ انٹربینک میں 6 پیسے مہنگا ہوکر 154 روپے 26 پیسے پر فروخت ہوا۔

یہ بھی پڑھیں:سات ماہ میں براہ راست غیرملکی سرمایہ کاری میں 66 فیصد اضافہ ہوا: سٹیٹ بینک

یہ بھی پڑھیں:ترسیلات زر میں اضافہ پاکستانی بینکوں اور کھاتہ داروں کیلئے مثبت ، زرمبادلہ کے ذخائر مستحکم ہونگے: عالمی ریٹنگ ایجنسی موڈیز کی رپورٹ

ادھر دو دن کی مندی کے بعد  بدھ کو پاکستان سٹاک مارکیٹ میں زبردست تیزی دیکھی گئی اور 100 انڈیکس میں 399 پوائنٹس کا اضافہ ہوگیا۔

بدھ کو کاروبار کا آغاز ہوا تو پہلے دو گھنٹوں کے دوران انڈیکس میں 200 پوائنٹس کی تیزی دیکھی گئی، دوپہر کو انڈیکس 40 ہزار 644 پوائنٹس  کی حد تک پہنچ گیا، کاروبار کا اختتام 399.17 پوائنٹس کی تیزی پر ہوا جس کے بعد مارکیٹ کا 100 انڈیکس 40574.52 پوائنٹس کی سطح پر پہنچ کر بند ہوا۔