وزیر اعظم کی کاروبار میں آسانیاں پیدا کرنے کے لیے تمام وسائل بروئے کار لانے کی ہدایت

322

اسلام آباد: وزیر اعظم عمران خان کا کہنا ہے کہ کاروبار میں آسانیاں پیدا کرنے کے لیے تمام وسائل بروئے کار لائے جائیں اور ٹیکنالوجی کا بھرپور استعمال کیا جائے۔

وزیر اعظم عمران خان کی زیر صدارت اجلاس ہوا، اجلاس میں معاون خصوصی فردوس عاشق اعوان، چیئرمین سرمایہ کاری بورڈ اور سینئر افسران شریک ہوئے۔

اجلاس میں کاروبار میں آسانیوں کے لیے اٹھائے جانے والے اقدامات پر بریفنگ دی گئی۔ بریفنگ میں بتایا گیا کہ چھوٹے اور درمیانے درجے کے کاروبار کے لیے سہولتوں پر کام جاری ہے، اجازت نامے اور رجسٹریشن کے عمل کو کمپیوٹرائزڈ کیا جا رہا ہے۔

بریفنگ میں کہا گیا کہ طریقہ کار آسان بنانے کے لیے خود کار نظام اور شفافیت کو یقینی بنایا جا رہا ہے، سرخ فیتے کے خاتمہ کے لیے بھی تیزی سے اقدامات اٹھائے جا رہے ہیں۔ اسمال اینڈ میڈیم انٹر پرائز پالیسی فریم تشکیل دیا جا رہا ہے۔

وزیر اعظم عمران خان نے کہا کہ کنٹریکٹ انفورسمٹ پر عمل اور لینڈ ریونیو ریکارڈ کو مزید منظم کیا جائے۔ نظام جدید خطوط پر استوارکرنے کے لیے وسائل بروئے کار لائے جائیں۔ انہوں نے ہدایت کی کہ ٹیکنالوجی کا بھرپور استعمال کیا جائے۔

اس سے قبل وزیر اعظم نے معروف صنعت کاروں اور کاروباری شخصیات کے وفد سے گفتگو کرتے ہوئے کہا تھا کہ کاروبار میں آسانیاں نہیں ہوں گی تو معیشت کا پہیہ نہیں چل سکتا۔

وزیر اعظم نے صنعتکاروں اور کاروباری شخصیات کو معیشت کے لیے تجاویز دینے کی پیشکش کرتے ہوئے کہا تھا کہ حکومت کی بھرپور کوشش ہے کہ کاروباری سہولتیں فراہم کی جائیں۔ روزگار کے مواقع پید ا کرنا اور غربت میں کمی حکومت کی اولین ترجیح ہے۔

جواب چھوڑیں

Please enter your comment!
Please enter your name here