وزارت توانائی پٹرولیم ڈویژن کی جانب سے پنجاب میں تیل کے ذخائر کی دوسری بڑی دریافت کا دعویٰ سامنے آیا ہے جس میں کہا گیا ہے کہ گوجر خان کے قریب تیل کے نئے ذخائر دریافت ہوئے ہیں۔
ترجمان پیٹرولیم ڈویژن کے مطابق گوجر خان کے غوری بلاک کے ڈھاریاں وَن کے معدنی کنویں سے تیل دریافت ہوا ہے۔
ترجمان کے مطابق ڈھاریاں ون سے 372بیرل یومیہ خام تیل ملنے کی توقع ہے اور یہ ماڑی پٹرولیم کی پنجاب میں دوسری بڑی دریافت ہے، دريافت گوجرخان کے قریب ڈھاریاں ون کے مقام پر کی گئی۔
واضح رہے کہ حکومت نے گزشتہ ماہ بھی تیل کے بڑے ذخائر کی دریافت کا دعویٰ کیا تھا، وزیر اعظم عمران خان نے کہا تھا کہ کمپنیوں کی جانب سے ملنے والے اشارے اگر قابلِ عمل ہوئے تو اس بات کا قوی امکان ہے کہ ہمارے سمندر میں تیل کا ایک بڑا ذخیرہ دریافت ہوسکتا ہے اور اگر ایسا ہوگیا تو پاکستان ایک یکسر مختلف درجے میں ہوگا۔ انہوں نے قوم کو دو ہفتوں میں خوشخبری دینے کا کہا تھا.
تاہم ابھی تک ایگزون موبل اور تیل دریافت کرنے والی بین الاقوامی کمپنی ای این آئی کی جانب سے کوئی باقاعدہ بیان سامنے نہیں آیا ہے جو جنوری سے تیل کی تلاش کے لیے کیکڑا-1 علاقے میں 230 کلومیٹر تک انتہائی گہری کھدائی کررہی ہے۔
