افغانستان نے پاکستان سے کینو کی درآمد پر کسٹم ڈیوٹی میں بڑا اضافہ کر دیا ہے جس سے برآمد کنندگان اور مقامی کسانوں میں تشویش پائی جاتی ہے۔
برآمد کنندگان نے کہا ہے کہ افغآنستان اب 29 لاکھ روپے فی 35 ٹن کنٹینر کسٹم ڈیوٹی عائد کر رہا ہے، جو کہ پچھلے سال کی شرح سے 43.5 فیصد زیادہ ہے۔
سرگودھا چیمبر آف کامرس اینڈ انڈسٹری کے صدر ساجد حسین تارڑ نے کسٹم ڈیوٹی میں اضافے کے اثرات پر تشویش کا اظہار کیا۔ انہوں نے کہا کہ اس سے نہ صرف کینو کی برآمدات متاثر ہوں گی بلکہ مقامی کاشتکاروں پر بھی منفی اثر پڑے گا، برآمدات میں کمی کی وجہ سے مقامی مارکیٹ میں پھلوں کی قیمت گرسکتی ہے۔
سرگودھا اور اس کے ہمسایہ اضلاع اعلیٰ معیار کے کینو اور مالٹے کی پیداوار میں شہرت رکھتے ہیں، ٹیرف میں اضافہ اس خطے کے لیے خاصا اہم ہے۔
ساجد حسین تارڑ نے پاکستانی کینو کی ایک اہم منڈی کے طور پر افغانستان کی اہمیت پر روشنی ڈالتے ہوئے کہا کہ کابل سٹرس فروٹ کی درآمدات کے خلاف مسلسل اقدامات کر رہا ہے۔ کسٹم ڈیوٹی کو 20 لاکھ روپے سے بڑھا کر فوری طور پر 29 لاکھ روپے کر دیا گیا ہے، جو گزشتہ سال 5 لاکھ روپے سے بڑھا کر 20 لاکھ روپے کر دیا گیا تھا۔
کسٹم ڈیوٹی میں حالیہ اضافے سے پریشان ساجد حسین تارڑ نے انکشاف کیا کہ انہوں نے وفاقی حکومت اور وزیر تجارت کو خط لکھا ہے، جس میں ان پر زور دیا گیا ہے کہ وہ اس مسئلے کو کابل حکومت کے ساتھ معقول ٹیکس ڈھانچے اور برآمد کنندگان کو ریلیف کے لیے حل کریں۔ انہوں نے خبردار کیا کہ برآمدی ہدف کو حاصل کرنا مشکل ہو جائے گا، کیونکہ پاکستانی کینو کی کل برآمدات کا تقریباً نصف افغان منڈی کو جاتا ہے۔
گزشتہ سال کابل کی طرف سے اسی طرح کے ٹیکس کی شرح میں اضافے کا حوالہ دیتے انہوں نے کہا کہ اسلام آباد کی مداخلت سے ٹیکس کی شرح میں 60 فیصد کمی واقع ہوئی۔
ایس سی سی آئی کے سابق صدر شعیب احمد بسرا نے خدشہ ظاہر کیا کہ کسٹم ڈیوٹی کے مسئلے کو حل کرنے میں ناکامی کے نتیجے میں مقامی مارکیٹ میں کینو کی قیمتوں میں نمایاں کمی ہو سکتی ہے، جو کہ ممکنہ طور پر 1000 روپے فی 40 کلوگرام سے نیچے گر سکتی ہے جبکہ گزشتہ سال 40 کلوگرام اوسطاً 2,000 روپے سے زیادہ تھی۔ انہوں نے خبردار کیا کہ کینو کے مخصوص علاقوں میں سفید مکھی کے حملوں جیسے چیلنجز کی روشنی میں یہ باغات کے مالکان کے لیے تباہ کن نتائج کا باعث بن سکتا ہے۔
