وزارت خزانہ نے مالی طور پر دباؤ کا شکار پاور سیکٹر کو 200 ارب روپے کی سبسڈی فراہم کی ہے، جس کا مقصد گردشی قرضے کے بڑھتے ہوئے مسئلے کو حل کرنا ہے، جو تازہ ترین تخمینوں کے مطابق بنیاد پر 27 کھرب روپے تک بڑھ گیا ہے۔
اس رقم کی منظوری کے بعد پاور سیکٹر میں بقایا گردشی قرضہ دسمبر 2023 کے آخر تک تقریباً 25 کھرب روپے ہونے کا امکان ہے۔
سرکاری ذرائع نے تصدیق کی کہ یہ سبسڈی بجلی اور گیس دونوں شعبوں کو ان کے متعلقہ گردشی قرضوں کے تصفیہ میں مدد فراہم کرے گی۔ مختص فنڈز گیس کمپنیوں کو 80 ارب روپے کے گردشی قرضے کی ادائیگی کے لیے استعمال کیے جائیں گے۔
ایک اعلیٰ عہدیدار نے بتایا کہ وزارت خزانہ نے بدھ کی شام کو رقم کی تقسیم کی منظوری دی، اور جمعرات کو متعلقہ وزارت کو فنڈز فراہم کر دیے گئے۔
کابینہ کی اقتصادی رابطہ کمیٹی (ای سی سی) نے، 19 دسمبر 2023 کو اپنے اجلاس میں آزاد پاور پروڈیوسرز (آئی پی پیز) کے مساوی طور پر حکومت کے زیر ملکیت پاور پلانٹس (جی پی پی) کو ادائیگیوں کے تصفیہ کے حوالے سے ایک سمری پر غور کیا۔ ای سی سی نے ٹیکنیکل سپلیمنٹری گرانٹ (ٹی ایس جی) کے ذریعے پبلک سیکٹر پاور پلانٹس کو 262.075 ارب روپے جاری کرنے کی منظوری دی۔
وزارت بجلی نے حکومت کی ملکیت والے پاور پلانٹس جی پی پیز کو دوسری سہ ماہی کی ادائیگی کے لیے 262.075 ارب روپے کی ٹیکنیکل سپلیمنٹری گرانٹ کی منظوری کی درخواست کی تھی۔ اس میں مختلف اداروں کو مختص کیا گیا تھا، جن میں Genco-11، Genco-111، واپڈا، قائداعظم تھرمل پاور (RLNG) اور قائداعظم سولر پاور شامل ہیں
ای سی سی نے درخواست کو منظور کرتے ہوئے غیر ملکی قرضوں اور نقد ترقیاتی قرضوں کو کلیئر کرنے کے لیے فنڈز کے استعمال کی ہدایت کی۔
مالی سال 2023-24 کے لیے کے-الیکٹرک کے ٹیرف ڈفرنشل سبسڈی کے بقایا جات کے لیے بجٹ میں 127 ارب روپے مختص کیے گئے ہیں۔
پاور سیکٹر کی لیکویڈیٹی کو یقینی بنانے کے لیے CPPA-G کو پیشگی سبسڈی کے طور پر 57 ارب روپے کی فوری ریلیز کا آغاز کر دیا گیا ہے۔
