کورونا ویک نامی اس ویکسین کے انسانی ٹرائل کے آخری مرحلے کے ابتدائی نتائج برازیل کے بوتانتین انسٹیٹوٹ نے جاری کیے۔ یہ انسٹیٹوٹ برازیل میں اس ویکسین کے انسانی آزمائش کے تیسرے مرحلے کے ٹیسٹوں پر کام کر رہا ہے اور اس کا کہنا ہے کہ 9 ہزار رضاکاروں میں اس تجرباتی ویکسین کے دو ڈوز کا استعمال محفوظ ثابت ہوا ہے۔

مگر برازیلین محققین کا کہنا تھا کہ نئے کورونا وائرس کے حوالے سے یہ ویکسین لوگوں کو تحفظ فراہم کرنے میں کتنی موثر ہے، اس کا ڈیٹا اس وقت تک جاری نہیں کیا جائے گا، جب تک اس کا تجربہ توسیعی ٹرائلز کے تمام 15 ہزار رضاکاروں پر نہیں کرلیا جاتا۔

برازیل کی ریاست سائوپاؤلو کے سٹیٹ ہیلتھ سیکرٹری جین گورنچیتیان نے بتایا کہ ویکسین سے بظاہر تحفظ فراہم کرنے والی اینٹی باڈیز بنتی ہیں اور توقع ہے کہ رواں سال کے آخر تک اس کی ریگولیٹری منظوری دے دی جائے گی اور 2021 کے شروع میں لوگوں کے لیے اس کا استعمال شروع ہو جائے گا۔