گرمی سے کورونا وائرس کے ختم ہونے کی بات میں کتنی سچائی ہے؟

لاہور: یہ شائد پہلی بار ہے کہ لوگوں کو گرمیوں کی آمد کا شدت سے انتطار ہے، اس انتظار کی وجہ موسم گرما کے مزے دار مشروبات اور پھل نہیں بلکہ دنیا بھر میں تباہی پھیلانے والے کورونا وائرس کے بارے میں یہ خیال ہے کہ شائد گرمی پڑتے ہی یہ وائرس ختم ہو جائے۔  

کورونا وائرس کے سورج کی گرمی سے ختم ہونے سے متعلق ماہرین صحت کسی ایک رائے کی بجائے الگ الگ خیالات کا اظہار کرتے نظر آتے ہیں۔

سے سے پہلے تو ورلڈ ہیلتھ آرگنائزیشن (ڈبلیو ایچ او) کے ماہرین نے خبردار کیا تھا کہ کورونا وائرس گرم علاقوں میں بھی پھیل سکتا ہے اور یہ وائرس سردی یا برفباری کی وجہ سے ختم نہیں ہوتا۔

امریکہ کی میری لینڈ یونیورسٹی کے گلوبل وائرس نیٹ ورک کے سائنس دانوں نے ایرانی سائنس دانوں کے ساتھ مل کر جدید ترین موسمیاتی ماڈل استعمال کرکے دیکھا کہ کووڈ 19 کا پھیلاؤ کس حد تک موسم پر منحصر ہے۔

اب امریکی سائنسدانوں نے دعویٰ کیا ہے کہ سورج کی طاقتور شعاعیں ہوا اور سطحوں پر کورونا وائرس کو فوری ختم کر دیتی ہیں۔ تاہم یہ تحقیق ابھی منظرعام پر نہیں لائی گئی ہے۔

فرانسیسی خبر رساں ادارے کے مطابق امریکی وزیر داخلہ کے مشیر برائے سائنس و ٹیکنالوجی ولیم برائن نے جمعہ کو وائٹ ہاؤس میں صحافیوں کو بتایا  کہ امریکی سائنسدانوں کی تحقیق کے مطابق سورج کی شعاعیں کووڈ 19 کو ختم کرنے کی طاقت رکھتی ہیں اور امید ہے کہ موسم گرما تک اس کا پھیلاؤ کم ہو جائے گا۔

انہوں نے کہا کہ امریکہ کی اب تک کی سب سے بڑے مشاہدہ میں یہ بات سامنے آئی ہے کہ شمسی توانائی ہوا اور سطحوں پر وائرس کو ختم کرنے میں مددگار ثابت ہو گی اور ہم نے درجہ حرارت اور نمی میں بھی ایک جیسے اثرات دیکھے ہیں جہاں درجہ حرارت اور نمی میں اضافہ ہوتا ہے یا دونوں ہی کورونا وائرس کے لیے کم فائدہ مند ہیں۔

برائن نے کہا کہ وائرس کی نصف زندگی 18 گھنٹے ہے جب غیر محفوظ سطح یعنی دروازوں، ہینڈلز اور سٹیل کی چیزوں پر درجہ حرارت 20 فیصد نمی کے ساتھ 21 سے 24 سینٹی گریڈ ہو لیکن وائرس کی باقی آدھی زندگی 6 گھنٹے تک ہوتی ہے جب نمی کا تناسب 80 فیصد تک ہو اور اس کے ساتھ ساتھ 2 منٹ تک سورج کی شعاعیں بھی اس میں شامل ہوں۔

انہوں نے کہا کہ ہوا میں وائرس کی آدھی زندگی ایک گھنٹہ ہے جب درجہ حرارت 20 فیصد نمی کے ساتھ 70 سے 75 ڈگری سینٹی گریڈ ہو اور اگر اس میں سورج کی شعاعیں بھی داخل ہوں تو وائرس کی زندگی ڈیڑھ منٹ تک رہ جاتی ہے۔

انہوں نے کہا کہ گرم موسم میں وائرس کی منتقلی یا پھیلاؤ کم ہو سکتا ہے لیکن اس کا یہ مطلب نہیں ہے کہ یہ وباء مکمل طور پر ختم ہو جائے گی بلکہ سماجی فاصلے کی ہدایات پر عملدرآمد کرنا ہو گا۔

انہوں نے کہا کہ یہ ہماری غیرذمہ داری ہو گی کہ ہم یہ خیال کریں کہ گرم موسم میں یہ وائرس مکمل طور پر ختم ہو جائے گا اور ہم سب آزاد ہیں اور لوگ احتیاطی تدابیر کو نظر انداز کر دیں۔