کورونا وائرس: پاکستان میں 55 ہلاکتیں، مریضوں کی تعداد چار ہزار سے زائد ہو گئی

لاہور: پاکستان میں کورونا وائرس سے مزید دو افراد کی موت کے بعد ہلاکتوں کی تعداد 55 ہوگئی جب کہ مزید نئے کیسز سامنے آنے کے بعد ملک بھر میں مریضوں کی تعداد چار ہزار(4008) سے زائد ہو گئی، وائرس کا شکار ہونے والے 436 افراد اب تک صحت یاب ہو چکے ہیں۔

ملک بھر میں کورونا وائرس سے سب سے زیادہ متاثرہ صوبہ پنجاب ہے جہاں متاثرین کی تعداد دو ہزار سے تجاوز کر گئی ہے جبکہ 15 افراد جاں کی بازی ہار چکے ہیں۔

سندھ میں سب سے زیادہ 18 اموات ہو چکی ہیں، خیبر پختونخوا 17، گلگت بلتستان میں تین، بلوچستان اور وفاقی داراحکومت اسلام آباد میں ایک ایک ہلاکت ہوئی ہے۔

فوج نے طبی سامان بلوچستان روانہ کردیا

آرمی چیف جنرل قمر جاوید باجوہ کے احکامات پر پاک فوج نے بلوچستان میں طبی عملے کی مدد کے لیے ذاتی تحفظ کے آلات سمیت طبی سامان روانہ کرنے کا اعلان کردیا۔

پاک فوج کے شعبہ تعلقات عامہ آئی ایس پی آر کے ڈائریکٹر جنرل (ڈی جی) میجر جنرل بابر افتخار کی جانب سے ٹوئٹر پر جاری بیان میں کہا گیا کہ آرمی چیف کے احکامات پر بلوچستان میں کووڈ 19 کے خلاف مؤثر لڑائی لڑنے والے میڈیکل اسٹاف کی مدد کے لیے ذاتی تحفظ کے آلات (پی پی ایز) سمیت طبی سامان کی ایمرجنسی سپلائی کوئٹہ کے لیے روانہ کی جارہی ہے۔

لاہور: نجی ہائوسنگ سوسائٹی کے 16 گارڈز وائرس کا شکار

لاہور میں رائیونڈ کے نزدیک نجی ہاؤسنگ کے 16 سیکیورٹی گارڈز میں کوروناوائرس کی تصدیق کی گئی ہے۔

ذرائع کےمطابق رائیونڈ کےقریب نجی ہاؤسنگ سوسائٹی میں 16 سیکیورٹی گارڈز میں کورونا وائرس کی تصدیق ہونے کے بعد فارم ہاؤس میں موجود افرادکو کورونا ٹیسٹ کے لیے اسپتال منتقل کردیا گیا ہے۔

ذرائع کا کہنا ہے نجی ہاؤسنگ سوسائٹی میں رینجرز اور پولیس تعینات کرکے  سوسائٹی کو لاک ڈاون کرنے کی تیاریاں شروع کردی گئی ہیں۔

پی آئی اے نے پائلٹس کیلئے حفاظتی کٹس چین سے منگوا لیں

قومی ایئر لائن نے پائلٹس اور کیبن کریو کے لیے چین سے حفاظتی کٹس درآمد کر لیں۔

پائلٹس تنظیم پالپا کے مطالبے کے بعد پی آئی اے نے فضائی عملے کے لیے حفاظتی کٹس درآمد کر لی ہیں، ذرایع کا کہنا ہے کہ ایک سی 130 طیارے کے ذریعے یہ سامان کراچی سے اسلام آباد پہنچا دیا گیا ہے۔

ذرایع ایئر لائن کا کہنا ہے کہ اسلام آباد سے شمالی علاقوں کی پروازوں میں یہ حفاظتی کٹس استعمال کی جائیں گی۔

چینی کمپنی کا بلوچستان کیلئے تحفہ 

چینی کمپنی نے کورونا وائرس سے متاثرہ پاکستان کے پسماندہ صوبے بلوچستان کے لیے فیس ماسک، سیفٹی کٹس، ٹیسٹ کٹس اور دوائیوں کا تحفہ بھجوا دیا۔

ایک اخباری رپورٹ کے مطابق طبی سامان کی 11 ہزار پونڈ کی کھیپ پاک فضائیہ کے سی 130 طیارے کے ذریعے کوئٹہ لائی گئی۔

یہ کھیپ چین کی محکمہ موسمیات کی تعمیراتی کارپوریشن (ایم سی سی) نے بھیجی تھی اور اس کے اگلے ہی دن اسے اسلام آباد میں نیشنل ڈیزاسٹر مینجمنٹ اتھارٹی نے وصول کیا۔

لاک ڈائون میں توسیع

پنجاب میں لاک ڈائون میں 14 اپریل تک جبکہ بلوچستان حکومت نے کورونا وائرس کے پیش نظر صوبے میں لاک ڈاؤن میں مزید دو ہفتوں کی توسیع کردی۔

محکمہ داخلہ بلوچستان سے جاری نوٹی فکیشن کے مطابق اب صوبے میں 21 اپریل تک لاک ڈاؤن برقرار رہے گا۔

عالمی صورت حال 

کورونا وائرس کی ہلاکت خیز وبا دنیا بھر میں 74 ہزار سے زائد انسانوں کی زندگیاں نگل گئی جبکہ متاثرہ افراد کی تعداد 13 لاکھ چالیس سے تجاوز کرگئی۔

حوصلہ افزاء بات یہ ہے کہ 2 لاکھ 78 ہزار سے زائد کرونا مریض ڈاکٹروں کی جدوجہد کی بدولت صحتیاب ہوچکے ہیں۔

امریکا کرونا وائرس سے متاثر ہونے والے ممالک میں سر فہرست ہے جہاں ہلاکتوں کی تعداد ساڑھے 10 ہزار سے تجاوز کرگئی جبکہ 3 لاکھ 63 ہزار سے زائد افراد متاثر ہوچکے ہیں۔

اسپین میں 13 ہزار 341 افراد کی جانیں نگل چکا ہے جبکہ متاثرین کی تعداد 1 لاکھ 31 ہزار سے زائد ہے۔

اٹلی میں جان لیوا وبا اب تک 16 ہزار 523 لوگوں کو ہلاک جبکہ 1 لاکھ 32 ہزار سے زائد لوگوں کو متاثر کرچکی ہے۔

فرانس میں وائرس نے 8911 جانیں لیں اور 98 ہزار سے زائد افراد کو مریض بنایا جبکہ برطانیہ میں اموات کی تعداد 5373 اور مریضوں کی تعداد 51 ہزار سے تجاوز کرگئی۔

ایرانی ڈاکٹروں اور حکام نے وائرس کے پھیلاؤ پر تقریباً قابو پالیا ہے جس کے باعث وہاں ہلاکتوں کی شرح میں کمی آئی ہیں۔ اس کے باوجود وائرس نے 3739 افراد جاں بحق ہوئے ہیں جبکہ 60 ہزار سے افراد متاثر ہیں۔

چین نے وائرس پر کئی روز قبل ہی قابو پالیا تھا جس کے باعث وہاں اموات کی شرح تقریباً نہ ہونے کے برابر ہے، چین میں 3331 افراد ہلاک جبکہ 81 ہزار لوگ تاحال متاثر ہیں۔

جرمنی میں کرونا وائرس سے 1735 افراد ہلاک اور ایک لاکھ سے زائد مریض ہیں، کرونا وائرس نے بیلجیئم میں 1632، سوئٹزرلینڈ میں 765 اور ترکی میں 649 انسانی جانیں لیں جبکہ 30 ہزار سے زیادہ لوگوں کو متاثر کیا۔

وائرس برازیل میں بھی 553، سوئیڈن میں 477، پرتگال میں 311، کینیڈا میں 322، انڈونیشیا میں 209، آسٹریا میں 220، نیدرلینڈز میں 1867 افراد ہلاک 18 ہزار سے زائد متاثر ہیں جبکہ بھارت میں 4 افراد کو لقمہ اجل بنایا جبکہ 136 افراد متاثر ہیں۔