کورونا وائرس: پاکستان میں کیسز کی تعداد 876، ہلاکتیں 6 ہو گئیں، پنجاب میں بھی جزوی لاک ڈائون، چاروں صوبوں میں فوج طلب

لاہور: سندھ، بلوچستان، گلگت بلتستان اور اسلام آباد میں کورونا وائرس کے مزید کیسز سامنے آنے کے بعد پاکستان میں متاثرہ افراد کی تعداد 876 تک جا پہنچی ہے جبکہ بلوچستان اور گلگت بلتستان میں ایک ایک شخص کی موت کے بعد ملک میں وائرس سے ہلاکتوں کی تعداد 6 ہو گئی ہے، اب تک 6 افراد عالمی وبا سے صحت یاب بھی ہو چکے ہیں۔

کورونا وائرس کے سرکاری پورٹل کے مطابق سندھ میں آج 61 افراد میں کورونا وائرس کی تصدیق ہوئی جس سے صوبے میں مریضوں کی تعداد 394 ہوگئی، پنجاب میں مزید 21 افراد میں تصدیق کے بعد 246، بلوچستان میں 6 نئے کیسز کے بعد 110، گلگت بلتستان میں 17 نئے کیسز کے بعد 72، خیبرپختونخوا میں 7 نئے کیسز کے بعد 38، وفاقی دارالحکومت میں مزید 4 کیسز کے بعد تعداد 15 ہو گئی ہے۔ پاکستان کے زیر انتظام کشمیر میں بھی ایک شخص کورونا کا شکار ہو چکا ہے۔

پنجاب میں بھی 14 روزہ لاک ڈائون کا اعلان

وزیراعلیٰ پنجاب عثمان بزدار نے صوبے میں 14 دن کے لیے جزوی لاک ڈاؤن کا اعلان کردیا ہے۔

لاہور میں میڈیا سے گفتگو کرتے ہوئے انہوں نے صوبے میں کورونا وائرس کے مریضوں کی تعداد بتاتے ہوئے کہا کہ اب تک 246 افراد میں کورونا وائرس کی تصدیق ہوچکی ہے۔

انہوں نے کہا کہ آج انسداد کورونا ٹیم کا اجلاس ہوا جس کے تحت صوبے میں کورونا وائرس سے متعلق کچھ اہم فیصلے کیے۔ ساتھ ہی انہوں نے بتایا کہ 14 دن کے لیے صوبےمیں ڈبل سوار پر بھی پابندی لگائی جارہی ہے۔ اس موقع پر انہوں نے واضح کیا کہ یہ کوئی کرفیو یا لاک ڈاؤن نہیں ہے۔

سندھ میں 15 روزہ لاک ڈائون

وزیراعلیٰ سندھ مراد علی شاہ کے احکامات کے بعد 22  مارچ کی رات 12 بجے سے صوبے بھر میں لاک ڈاؤن کردیا گیا ہے ۔

ایک ویڈیو بیان میں مراد علی شاہ نے کہا تھا کہ تمام سیاسی جماعتوں، علمائے کرام اور دیگر حکام سے مشاورت کے بعد فیصلہ کیا گیا۔

انہوں نے کہا کہ کورونا وائرس کے پھیلاؤ کو روکنے کے لیے صوبے بھر میں رات 12 بجے سے لاک ڈاؤن ہوگا اور شاپنگ مالز، تعلیمی ادارے اور دیگر مارکیٹس پہلی ہی بند ہیں تاہم اب دیگر دفاتر بھی بند ہوں گے۔

یہ بھی پڑھیے:

’کورونا وائرس سے لڑنے کیلئے پاکستان کو لاک ڈائون کرنا ہی پڑے گا‘

کورونا وائرس کے معیشت پر اثرات، حکومت کا کاروباری طبقے کو بیل آؤٹ پیکج دینے پرغور

چاند پر انسان کی واپسی کے مشن کو دھچکا، کورونا وائرس کے باعث راکٹ کی تیاری روک دی گئی

کورونا وائرس سے نمٹنے کیلئے 61 قسم کے طبی آلات کی درآمد پر ٹیکس ختم

ان کا کہنا ہے کہ اب عوام کو محتاط ہوکر گھروں میں بیٹھنا ہے، یہ کرفیو نہیں (کیئر فار یو) ہے اور اس دوران لوگوں کوبلا ضرورت گھرسے نکلنے کی اجازت نہیں ہوگی، اگر کسی کام سے نکلیں تو شناختی کارڈ ساتھ رکھیں۔

23 مارچ کو کراچی سمیت سندھ کے بڑے شہر بالکل ویران رہے، پبلک ٹرانسپورٹ پر پابندی کے باعث ٹریفک سڑکوں سے غائب رہی جبکہ لاک ڈائون پر عملدرآمد کروانے کیلئے پولیس اور فوج کا گشت جاری رہا، لاک ڈائون کی خلاف ورزی پر کئی افراد کو حراست میں بھی لیا گیا۔

وزیر تعلیم سندھ سعید غنی بھی کورونا وائرس کا شکار

وزیر تعلیم سندھ سعید غنی بھی کورونا وائرس کا شکار ہوگئے جس کی تصدیق انہوں نے اپنے ویڈیو بیان میں کی ہے۔

سماجی رابطوں کی ویب سائٹ ٹوئٹر پر جاری بیان میں سعید غنی نے بتایا کہ انہوں نے گزشتہ روز کورونا کا ٹیسٹ کرایا جو مثبت آیا ہے۔

ان کا مزید کہنا تھا کہ ‘تاحال جو علامات اس وائرس کے بتائے جاتے ہیں ان میں سے مجھے کچھ محسوس نہیں ہورہا اور میں خود کو بالکل صحتمند محسوس کررہا ہوں اور اپنی ذمہ داریاں گھر پر آئسولیشن میں رہ کر ادا کررہا ہوں’۔ انہوں نے  شہریوں سے بھی اپیل کی کہ وہ گھروں پر رہیں۔

آزاد کشمیر، گلگت بلتستان سمیت چاروں صوبوں میں فوج طلب

آزاد کشمیر اور گلگت بلتستان سمیت کورونا وائرس کے پھیلائو کے پیش نظر لوگوں میں گھروں تک محدود رکھنے اور امدادی سرگرمیوں میں سول انتظامیہ کی مدد کیلئے فوج کو تعینات کردیا گیا ہے۔

وزیراعلیٰ پنجاب عثمان بزدار کے مطابق موجودہ صورتحال کے پیش وفاق سے نظر سیکشن 245 کے تحت صوبے میں پاک فوج سے مدد کی اپیل کی ہے۔ انہوں نے کہا کہ اس وقت ایمرجنسی ہے، ہم سب کو مل کو اس چیلنج کا مقابلہ کرنا ہو گا۔

ان کا کہنا تھا کہ پنجاب میں کورونا سے نمٹنے کے لیے5 خصوصی اسپتال بنا رہے ہیں، ایمرجنسی کی صورت میں پنجاب حکومت ایک لاکھ لوگوں کی دیکھ بھال کر سکتی ہے۔

عثمان بزدار نے کہا کہ پنجاب میں کسی قسم کی خوراک کی قلت نہیں ہے، انسانی ہمدردی کی بنیاد پر بلوچستان کی مالی امداد کا اعلان کیا ہے۔

حکومت بلوچستان نے بھی کورونا وائرس سے نمٹنے کے لیے صوبے میں پاک فوج کی تعیناتی کے لیے وفاقی وزارت داخلہ سے مدد طلب کی ہے۔

گلگت میں کورونا کے خلاف فرنٹ لائن پر موجود ڈاکٹر شہید

گلگت بلتستان میں کورونا وائرس کے خلاف جنگ کے ہراول دستے میں شامل ڈاکٹر اسامہ ریاض شہید ہوگئے۔

گلگت بلتستان میں داخل ہونے والے مسافروں میں کورونا وائرس کی اسکریننگ کے دوران ڈاکٹر اسامہ ریاض خود بھی اسی مہلک وائرس سے متاثر ہوگئے تھے۔

ڈاکٹر اسامہ مقامی اسپتال میں 2 دن تک تشویشناک حالت میں وینٹی لیٹر پر رہنے کے بعد آج خالق حقیقی سے جاملے۔

محکمہ اطلاعات گلگت بلتستان نے بھی تصدیق کی ہے کہ کورونا وائرس کے خلاف جنگ میں ہر اول دستے کا کردار ادا کرنے والے ڈاکٹر اسامہ ریاض جام شہادت نوش کر گئے ہیں۔

گلگت حکومت کی جانب سے شہید کو قومی ہیرو کا درجہ دیا جائے گا۔

سندھ کے ائیرپورٹس مقامی پروازوں کیلئے بھی بند

کورونا وائرس سے بچاؤکےلیے لاک ڈاؤن کے باعث سندھ کے ائیرپورٹس مقامی پروازوں کے لیے بند کر دیے گئے۔

سول ایوی ایشن کی جانب سے جاری نوٹم کے مطابق پابندی کا اطلاق 24 مارچ کی صبح 6 بجے سے ہوگا۔

نوٹم میں بتایا گیا ہےکہ جناح انٹرنیشنل ائیرپورٹ کراچی اور سکھر ائیر پورٹ مقامی پروازوں کے لیے بند رہیں گے، دونوں ائیرپورٹس 24 مارچ کی صبح 6 بجے سے پروازوں کےلیے مکمل بند ہو جائیں گے۔

یوم پاکستان کی تقریبات منسوخ

کورونا وائرس سے پیدا ہونے والی صورتحال کے پیش نظر یوم پاکستان سادگی کے ساتھ منایا جا رہاہے، اس دن کی مناسبت سے ہونے والی پریڈ اور ایوان صدر میں قومی اعزازات کی تقریب پہلے ہی منسوخ کی جا چکی ہیں۔

وزیراعظم عمران خان نے یوم پاکستان پر اپنے پیغام میں کہا کہ یوم پاکستان پر ہمیں اپنی صفوں میں اتحاد، نظم و ضبط کی ضرورت ہے، پوری دنیا کو لپیٹ میں لینے والی آفت کا ہم نظم و ضبط کے ذریعے مقابلہ کر سکتے ہیں، ہم وطنوں سے درخواست کرتا ہوں کہ وہ خوف میں مبتلا نہ ہوں، حفاظتی تدابیر اختیار کریں۔

عمران خان نے کہا کہ ذاتی طور پر اس وبا سے مقابلہ کرنے کے لیے حکومتی اقدامات کی نگرانی کر رہا ہوں، ان شاء اللہ، ہم اس آزمائش میں کامیاب ہوں گے، اللہ تعالی موجودہ آزمائش میں ہمیں ثابت قدم رہنے کا حوصلہ و ہمت عطا فرمائے۔

ویڈیو لنک پر کور کمانڈرز کانفرنس

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت خصوصی کور کمانڈرز کا اجلاس جی ایچ کیو راولپنڈی میں ویڈیو لنک کے ذریعے ہوا جس کا واحد ایجنڈا کورونا وائرس سے بچاؤ تھا۔

کانفرنس میں کور کمانڈرز نے ویڈیو لنک کے ذریعے متعلقہ کور ہیڈ کوارٹرز سے شرکت کی اور اس دوران ملک بھر میں کورونا وائرس کی صورت حال، اس سے نمٹنے کے لیے سول انتظامیہ کی مدد کے لیے پاک فوج کی تیاری کا جائزہ لیا گیا۔

آئی ایس پی آر کے مطابق پاک فوج کے تمام جوانوں اور میڈیکل وسائل کو تیار رہنے اور مختصر نوٹس پر سول انتظامیہ کی مدد کرنے کا ٹاسک دے دیا گیا ہے۔ آرمی چیف جنرل قمر جاوید باجوہ  نے کہا کہ پاک فوج قومی خدمت اور تحفظ کی ذمہ داری بھرپور طریقے سے ادا کرے گی۔

امریکا کے 75 سفارتی اہلکار اپنے وطن واپس روانہ

اسلام آباد: امریکی سفارتخانے کے عملے کے 75 اراکین اسلام آباد انٹرنیشنل ایئرپورٹ سے خصوصی پرواز کے ذریعے امریکی ریاست جارجیا روانہ ہوگئے۔اس حوالے سے سفارتخانے کے ترجمان کا ایک بیان میں کہنا تھا کہ اسٹیٹ ڈپارٹمنٹ نے امریکی حکومتی اہلکاروں اور اہلِ خانہ کو 14 مارچ کو سفارتکار یا قونصلر کے عہدے سے راضاکارانہ واپسی کی اجازت دی تھی جو سمجھتے ہیں کہ انہیں نوول کورونا وائراس کا شکار ہونے کا خطرہ ہے یا وہ افراد جنہوں نے مناسب جواز ہپیش کر کے واپسی کی درخواست دی تھی۔