اسلام آباد: مشیر خزانہ ڈاکٹرحفیظ شیخ کی زیر صدارت فنانس ڈویژن کے جمعے کو ہونے والے اجلاس میں برآمدی شعبہ جات کو سہولیات کی فراہمی کے لیے تجاویز کا جائزہ لیا گیا، اجلاس میں چھوٹی اور درمیانے درجے کی صنعتوں کو خصوصی اہمیت دی گئی۔
اس موقعے پر مشیر تجارت نے شرکاء کوتفصیلی بریفنگ میں ڈیوٹی اور ٹیکس چھوٹ دینے پر بات کی گئی جو کہ برآمد کنندگان کے لیے سرمایے کے بہاؤ میں مددگار ثابت ہوسکتی ہے۔
دیگر تجاویز میں مختلف برآمد شدہ اشیاء پر پیش کی جانے والی چھوٹ کی شرح کی فہرستوں کو اپ ڈیٹ کرنا اور اسٹیٹ بینک آف پاکستان (ایس بی پی) کو تیزی سے چھوٹ کلئیر کرنے کے لئے فنڈز کی فراہمی شامل ہے۔
اجلاس کو بتایا گیا کہ برآمدات میں مددگار چھبیس شعبہ جات نے برآمدات بڑھانے کے لیے تجاویز دی ہیں، کچھ شعبہ جات کے جانب سے ایسی تجاویزسامنے آئی ہیں جن کو حکومتی مالی معاونت کی ضرورت نہیں۔
مشیر خزانہ نے وزارت تجارت، ایف بی آر اور کسٹمز کی کارکردگی کی تعریف کی تعریف کرتے ہوئے کہا کہ حکومت کا عزم ہے کہ برآمد کنندگان کو ہر ممکن سہولت دی جائے ۔
انہوں نے وزارت تجارت کو تمام اسٹاک ہولڈرز کے ساتھ مزید مشاورت کے بعد برآمدات بڑھانے کے لیے تجاویز کی تیاری کی ہدایت کی۔
انہوں نے کہا کہ اس ضمن میں وزارت خزانہ ہر ممکن تعاون کرے گی اور آئندہ بجٹ میں بھی اس حوالے سےمدد کی جائے گی ۔
