کورونا وائرس: عالمی بینک کا متاثرہ ممالک کیلئے 12 ارب ڈالر کے امدادی پیکج کا اعلان

نیویارک: چین سے پھیلنے والا کورونا وائرس دنیا کے 80 سے زائد ملکوں میں لوگوں کو متاثر کر چکا ہے اور عالمی معیشت بھی اسکے اثرات سے سست روی کا شکار ہو چکی ہے جس کے بعد عالمی بینک نے متاثرہ ممالک میں صحت اور معیشت پر مرتب ہونے والے اثرات سے نمٹنے کے لیے 12ارب ڈالر کے امدادی پیکج کا اعلان کیا ہے۔

ورلڈ بینک کے مطابق امدادی پیکج سے متاثرہ ملکوں میں صحت کے نظام کو بہتر بنانے میں مدد ملے گی تاکہ لوگوں کو وائرس سے محفوظ رکھا جا سکے اور بیماری کی نگرانی کے ساتھ ساتھ نجی شعبے کے ساتھ مل کر وائرس سے معیشت پر مرتب ہونے والے اثرات کو کم کیا جا سکے۔

یہ بھی پڑھیے:

کورونا وائرس، دنیا کا ہر خطہ متاثر، کھربوں ڈوب گئے

کورونا وائرس کا خوف: موبائل ورلڈ کانگریس کے بعدگیم ڈیویلپرز کانفرنس اور جنیوا انٹرنیشنل موٹرز شو بھی منسوخ

کورونا وائرس: حکومت نے عوام کو باخبر رکھنے کیلئے ویب پورٹل متعارف کرادیا

اس میں سے 2.7ارب ڈالر انٹرنیشنل بینک آف ری کنسٹرکشن اینڈ ڈیویلپمنٹ، 1.3 ارب ڈالر انٹرنیشنل ڈیولپمنٹ ایسوسی ایشن اور 6 ارب ڈالر انٹرنیشنل فنانس کارپوریشن نے دیے ہیں۔

اس حوالے سے ورلڈ بینک گروپ کے صدر ڈیوڈ مال پاس نے کہا ہے کہ ہم اس وائرس سے بچاؤں اور اس کے پھیلاؤ کو روکنے کے لیے ترقیاتی ممالک کی ضرورت کو مدنظر رکھتے ہوئے تیز اور لچکدار نظام بنانے پر کام کر رہے ہیں، اس میں ہنگامی بنیادوں پر فنڈ کی فراہمی، پالیسی میں مشاورت اور تکنیکی مہارت شامل ہے تاکہ ملکوں کو اس بحران سے نکالا جا سکے۔

واضح رہے کہ کورونا وائرس اب تک 80 سے زائد ممالک میں تین ہزار سے زائد افراد کورونا وائرس کی وجہ سے ہلاک ہو چکے ہیں صرف چین میں ہلاکتوں کی تعداد 2900 سے زائد ہے۔ چین کے بعد اٹلی، ایران اور جنوبی کوریا میں بھی وائرس کے نتیجے میں بڑی تعداد میں ہلاکتیں ہوئی اور روزانہ کی بنیاد پر وائرس کا شکار افراد کی تعداد بڑھتی جا رہی ہے۔