اسلام آباد: امریکا اور چین کے تجارتی تنازعات کے باعث پاکستان کی برآمدات میں ایک ارب ڈالر اضافہ متوقع ہے۔ یونائیٹڈ نیشنز کانفرنس آن ٹریڈ اینڈ ڈویلپمنٹ (یو این سی ٹی اے ڈی) کی رپورٹ کے مطابق چین اور امریکا کی جانب سے ایک دوسرے ملک سے کی جانے والی درآمدات کے ٹیرف میں اضافہ اور دیگر تجارتی تنازعات کے نتیجہ میں پاکستان کی مجموعی برآمدات میں 3.8 فیصد یعنی ایک ارب ڈالر کا اضافہ ہونے کی توقع ہے۔ گزشتہ مالی سال 2017-18ءمیں قومی برآمدات میں 14 فیصد کے اضافہ سے برآمدات کا حجم 23.212 ارب ڈالر رہاتھا۔ رپورٹ کے مطابق چین اور امریکا کی تجارتی جنگ کے باعث آسٹریلیا، برازیل، بھارت، فلپائن اور ویتنام کی برآمدات میں بھی اضافہ ہو گا۔ چین امریکا کو 250 ارب ڈالر جبکہ امریکہ چین کو 110 ارب ڈالر کی برآمدات کرتا ہے تاہم دونوں ممالک کے تجارتی تنازعات اور ٹیرف میں اضافہ سے امریکا اور چین کی باہمی تجارت میں کمی سے دیگر ممالک کو فائدہ ہو گا۔
