فیڈرل بورڈ آف ریونیو نے ملک بھر میں بغیر ڈیوٹی ادا کئے سگریٹ کی فروخت کے خلاف مہم کا آغاز کردیا ہے۔
ایف بی آر کے ذرائع کے مطابق اس سلسلے میں تمام متعلقہ حکام کو ہدایت کی گئی ہے کہ ایسے مقامات پر چھاپے مار کر سگریٹ ضبط کرلئے جائیں جہاں پر بغیر ڈیوٹی اداکئے سگریٹ کی فروخت ہو رہی ہے۔ ایف بی آر نے اس مہم کا آغاز مقامی مارکیٹ میں درآمدی سگریٹ کی فروخت کے حوالے سے شکایات موصول ہونے کے بعد کیا ہے۔ ڈیوٹی کی ادائیگی کے بغیر درآمد کئے گئے ان سگریٹ کی وجہ سے قومی خزانے کو نقصان پہنچ رہا ہے۔ غیر قانونی طور پر سگریٹ فروخت کرنے والوں کے خلاف قانونی کارروائی بھی عمل میں لائی جائے گی۔
