چین پاکستان کو قدرتی آفات سے نمٹنے کے آلات فراہم کرے گا، معاہدے پر دستخط

اسلام آباد: وفاقی وزیر اقتصادی امور حماد اظہر نے کہا ہے کہ پاک چین اقتصادی راہداری منصوبہ نئے مرحلہ میں داخل ہوا ہے اور نیو گوادر انٹرنیشنل ایئر پورٹ، گوادر ووکیشنل ٹریننگ سینٹر اور گوادر ہسپتال جیسے گرانٹ کی بنیاد پر مجوزہ منصوبوں کو مکمل کرنے کے کام میں تیزی لانے کی ضرورت ہے۔

پاکستان میں چین کے سفیر یائوجنگ اور چین کے کمرشل و اقتصادی قونصلر ژو سانگ سنگ سے ملاقات کے دوران گفتگو کرتے ہوئے حماد اظہر نے کہا کہ سی پیک نئے مرحلہ میں داخل ہواہے، پاکستان نے عوامی جمہوریہ چین کے تعاون سے بنیادی ڈھانچہ کو ترقی دی ہے۔

انہوں نے کہا کہ سی پیک کے جلد مکمل اور نتائج دینے والے (ارلی ہارویسٹ) منصوبے بالخصوص موٹرویز اور توانائی کے منصوبے مکمل ہیں جو تکمیل کے قریب ہیں، نیو گوادر انٹرنیشنل ایئرپورٹ، گوادر ووکیشنل ٹریننگ سینٹر اور گوادر ہسپتال جیسے گرانٹ کی بنیاد پر مجوزہ منصوبوں کو مکمل کرنے کے کام میں تیزی لانے کی ضرورت ہے۔

حماد اظہر نے کہا کہ سی پیک کے جاری مرحلہ کیلئے بنیادی ڈھانچہ اور توانائی کے منصوبوں پر اتفاق کیا گیا تھا، اگلے مرحلہ میں سماجی اور اقتصادی ترقی اور نجی کاروبار بالخصوص خصوصی اقتصادی زونز میں برآمدات پر مبنی صنعتوں کے فروغ پر توجہ مرکوز کی جا رہی ہے۔

یہ بھی پڑھیے:

کیا پاکستان سی پیک میں امریکا کو شامل کرنے جا رہا ہے؟

کرونا وائرس سے سی پیک کے تحت جاری منصوبوں کی بروقت تکمیل متاثر نہیں ہوگی: چینی سفیر

پاکستان اور چین نے 5 سالوں کے دوران سی پیک کے 32 منصوبے مکمل کر لیے

وفاقی وزیر نے ملک کے جنوبی علاقوں میں ٹڈی دل پر قابو پانے میں چین کی معاونت کا شکریہ ادا کیا۔ چینی ماہرین کی ٹیم پاکستان میں ٹڈی دل پر قابو پانے کیلئے پاکستان کے حکام کے ساتھ مل کرکام کر رہی ہے۔

اس موقع پرحکومت پاکستان اورچین کے درمیان ڈیزاسٹر مینجمنٹ آلات کی فراہمی کے معاہدے پردستخط بھی کئے گئے۔ یہ آلات چینی حکومت کی گرانٹ سے نیشنل ڈیزاسٹر مینجمنٹ اتھارٹی (این ڈی ایم اے) کو فراہم کئے گئے ہیں۔

ملاقات میں دونوں فریقوں نے قریبی کام جاری رکھنے اور اقتصادی تعلقات کو مزید فروغ دینے سے اتفاق کیا۔

ملاقات میں فیصلہ کیا گیا کہ دونوں ممالک کے مشترکہ اقتصادی کمیشن کا اجلاس رواں سال کے دوران منعقد ہوگا جس میں دونوں ممالک کے درمیان مختلف شعبوں میں تعلقات اور تعاون کو فروغ دینے کیلئے اقدامات کا جائزہ لیا جائے گا۔

حماد اظہر نے امید ظاہر کی کہ موجودہ حکومت نے کاروبار میں آسانیوں اور بیرونی سرمایہ کاروں کیلئے جو ترغیبات دی ہیں چین کے سرمایہ کار اس سے بھرپور طریقہ سے استفادہ کریں گے۔

چین کے سفیر اور کمرشل قونصلر نے اس موقع پر پاکستان کے ساتھ اقتصادی اور تجارتی تعلقات کو مزید وسعت دینے کے عزم کا اعادہ کیا۔