اسلام آباد: وفاقی کابینہ نے بجلی اور گیس کی قیمتوں میں اضافہ نہ کرنے کا اصولی فیصلہ کیا ہے جب کہ مہنگائی پر قابو پانے کے لیے مزید اقدامات بھی زیرِ غور ہیں۔
وزیراعظم ہائوس میں وزیراعظم عمران خان کی صدارت میں وفاقی کابینہ کے اجلاس میں 16 نکاتی ایجنڈا زیرغور آیا۔
حکومت کی جانب سے مہنگائی پر قابو پانے کے لیے کیے جانے والے اقدامات کا تفصیلی جائزہ لیا گیا جب کہ ارکان نے بجلی اور گیس کی قیمتوں میں اضافہ نہ کرنے کا اصولی فیصلہ کیا۔
وزیراعظم نے اجلاس کے دوران متعلقہ حکام کو مختلف اجناس کی قیمتوں کی کڑی نگرانی کرنے کی ہدایت کی جب کہ قبل ازیں ریلیف پیکیج بھی جاری کیا جا چکا ہے۔ ذرائع کے مطابق یہ ہدایت بھی کی گئی ہے کہ دالوں کی درآمد پر عائد ڈیوٹی کم کرنے کے لیے حکمتِ عملی تشکیل دی جائے تاکہ یہ کم قیمت پر دستیاب ہوں۔
وفاقی وزیر فیصل وئودا نے میٹابولزم ڈس آرڈر سے متاثرہ بچوں کی جانب توجہ دلائی جس پر وزیراعظم عمران خان نے انسانی جان بچانے والی مقوی خوراک کی درآمد پر پابندی ختم کر دی۔ وزیراعظم نے مشیرِ صحت کو ہدایت کی کہ وہ اس معاملے کا جائزہ لیں۔
